網紅的藏寶箱我成日有捐血，亦一早登記咗做骨髓捐贈者，所以對捐血、捐骨髓呢啲事情，係真心認同，並且以行動及身體去支持，身體力行嘛。
但係而家只因一個權貴嘅女兒罹患血癌，電台廣播呼籲香港人去登記捐骨髓，報紙又呼籲，高官又呼籲，連紅十字會都無端端搞兩日「特別捐血日」。畀人個感覺，就係捐血捐骨髓嘅義事，忽然變成權貴嘅特別服務。
香港每年六、七十人要接受骨髓移植，等待骨髓嘅人都肯定唔少，如果覺得重要，點解唔一早去呼籲人哋去登記，偏偏要等到權貴家庭出事先至出聲。唔通平民百姓條命唔值錢，權貴千金條命就矜貴啲？
好肉酸，好反感。
注：不過呢篇帖文，純粹呻兩句，我仍然會捐血／登記捐骨髓嘅。一來我肯定自己同呢個人唔吻合，唔駛人生交叉點去抉擇捐定唔捐，二來始終唔少同路人都需要血（或骨髓）。
唔係大愛上身，只係想分清兩件事：我係支持嘅係捐血／登記捐骨髓，但我反對為權貴開特別通道，對此反感。
Search